Bob.Sh.cn

今朝吃夜饭个辰光眼睛往电视机浪厢豁了豁，正好看到一只趣多多个广告。老实闲话我平常是勿看电视个，所以讲勿晓得搿只广告出来有多少辰光了。畀我个感觉是广告做拉蛮好：Cartoon形象蛮有意思，歌啊老扎劲个，小朋友看到肯定会得想买啦吃一眼了。

结果隔手就听到阿拉屋里厢个大人讲了。伊讲，搿只广告哪能嘎吓人个啦？个物事长拉瞎吓人！

一记头戆特。看起来搿只形象勿是所有人侪通吃个。实际浪厢，广告里厢个饼干形象是有一眼夸张个，加上身体比较扁，再加上身浪厢疙里疙瘩个，是有眼妖。勿习惯看夸张动画片里厢个人个大人看到以后勿习惯啊是讲得过去个。

还算好中年以上个人勿是趣多多个主要个消费个群体，否则搿广告就尴尬了。

搿只视频么我啊寻出来了，亻那一道来看看叫，是“恐怖”还是“好白相”。



P.S. [写畀上海个同胞] 看到搿一腔关于上海闲话生存危机个讨论蛮多个，我啊轧只闹猛。我建议所有上海个朋友（或者讲吴语个朋友）一道来用上海闲话（吴语）写blog，争取做到10篇里厢有1篇，用实际行动揎某些人个耳光。